Being Fluid

Saturday, August 26, 2017

कधी कधी वाटतं. ..
की मी लिहिलेली कविता,
तुझ्यापर्यंत पोहोचेल. ..
माझं नाव असणार नाही,
फक्त 'मी' असेल. ..
तरीही,
तू ओळखशील माझी कविता. ..
तुझंही नाव असणार नाही,
फक्त 'तू' असेल. ..
तरीही,
तू ओळखशील माझी कविता. ..
कधी कधी वाटतं. ..
की मी लिहिलेली कविता,
तुझ्यापर्यंत पोहोचेल. ..
(अपूर्ण. ..)

Friday, August 25, 2017

One incomplete poems. ..

कधी कधी स्टेशन च्या
त्या गल्लीतून जायचं काम पडतं
आणि मग माझं मन
उगीच अस्वस्थ होतं
म्हणून बहुधा मी टाळत असतो त्या वळणावरून वळणं
पण आयुष्याचंही
चालूच असतं मला छळणं
तेव्हा जावंच लागतं

(अपूर्ण. ..)

Monday, July 17, 2017

दरवर्षी पाऊस पडला,
की तिच्या आठवणीही
मग ओघानेच येतात. ..
तो उठून गच्चीवर येतो. ..
समोरच्या गच्चीवर ती असतेच,
पावसात चिंब भिजत. ..!
तिची कविता होते, त्याचा पाऊस. ..
हल्ली वर्षभर बंद असणारा रेडिओ
कुणाच्यातरी इथे सुरू होतो,
पावसांच्या प्रेमगीतांसोबत. ..!
तिचे गीत होते, तो संगीत. ..
तिला स्पर्शून तोच पाऊस
त्याच्या गच्चीवरही येतो. ..
त्याच्या अंगावर उठणारा
ती मग शहारा होते. ..
मग लक्षात येतं अरे,
हे भिजणं खरं नाही. ..
आता गच्चीवर भिजत
तिचं असणं खरं नाही. ..

Tuesday, April 18, 2017

हे आसवांनो, डोळ्यांत माझ्या
आलात का आज सांगा. ..
कुणी जोडीला हृद्यासवे
या नयनांचा धागा. ..

Thursday, January 19, 2017

वाटते
तुला भेटल्यावर. ..
आता कुणा का. ..?
भेटायचे. .. बोलायचे. ..
जाणायचे. ..

विरह
असा कसा
त्या सुर्यास आहे. ..?
कधीपासूनचा जळतोच
आहे. ..

मला
कळले निसर्गतत्व. ..
वसंतासाठी आधी ऋतूंना
पानगळ व्हावं
लागतं. ..

शोधले
किती दिवसरात्र
मी. .. मला. .. माझ्यामध्येच. ...
तरीही नं
भेटलो. ..

बोलायचे
बरेच असते. ..
बघता तुला विसरतो
शब्द सारे
ओठांवरचे. ..

उमललो. ..
फुललो. .. बहरलो. ..
गंध बनूनी दरवळलो. ..
मी तुझ्या
सहवासात. ..

प्रेमाला
जर मांडायचं
असतं एका शब्दात. ..
नाव तुझंच
असतं. ..

Thursday, January 5, 2017

◆
मी
न येणार
तुझ्या स्वप्नांत आता
तू पन्
टाळ

◆
मला
खूप छळते
तुझ्याविना हे माझ्या
आयुष्यात उरलेले
एकाकीपण

◆
मी
तुझ्यात गुंतलो
न माझा राहिलो
आता सर्वकाही
तूच

◆
माझ्या
वेदना कुणा
देवूनी मुक्त होवू
नव्या वेदना
घ्यावयाला

● ●●
(वाटलं स्वतःचाही काव्यप्रकार असावा. .. :-P
नियम : १, २, ३, २, १ )

गझलगंधर्व सुधाकर कदम यांच्या "सुधाकरी" ने प्रेरित एक कविता त्यांनाच सादर समर्पित. ..
◆

सुधाकरा तुझी
कविता वाचून
म्हंटलं लिहून
बघायचे. ..

Monday, January 2, 2017

तुझं येणं माझ्या आयुष्यात
वसंतासारखं होतं. ..
पानगळीतल्या मला
पालवी फुटली. ..
तुझ्या सहवासात
मी उमललो. ..
फुललो. ..
बहरलो. ..
गंध बनून
दरवळलो. ..

Sunday, January 1, 2017

आजचा दिवस नं मला
तुझ्यासोबत घालवायचा होता. ..
नाही म्हणजे तसं
आज विशेष काही नव्हतं. ..
पण. ..
वर्षाचा पहिला दिवस. ..
पहिला दिवस जसा घालवला नं
तर म्हणे वर्ष पण तसंच जातं. ..
येशील नं?
म्हणूनच म्हंटलं होतं. ..
तू आलीस. ..
सुंदर दिसत होतीस. ..
म्हणजे सुंदरच आहेस तू
पण आज तसं सांगावसंही वाटलं. ..
का? ते नाही माहित. ..
तुझं आज भेटणं. ..
आपलं बोलणं. ..
तुझं हसणं. ..
आणि माझं
तुझ्याकडे बघणं. ..
सगळं बरोबरच होतं. ..
मग तुझ्या मैत्रिणी आल्या. ..
तुमच्या गप्पा सुरु झाल्या. ..
आणि मग मी आणि कंटाळा. ..
मी म्हंटलं पण नं?
"कंटाळा येत आहे" म्हणून. ..
तुझं लक्षच नव्हतं कदाचित. ..
नंतर तुझा कॉल आला
कि नं सांगताच का निघालास?
नाही म्हणजे "सोबत" होतीस तू ..
पण तुझी "साथ" हवी होती मला ..
हे अंतर कळेल का तुला?
मग तू थांबलीस
आणि मी एकट्यानेच चालत राहलो. ..
यात चुकलं का माझं?
तुला एकटं सोडलं म्हणून माफ कर. ..
पण मी म्हंटलं होतं नं? "कंटाळा येत आहे". ..
© विशाल इंगळे